Tata Ibadah Parningotan Hananaek ni Tuhan Jesus 30 Mei 2019

I.                    JOUJOU PARSOMBAON TU DEBATA

   U :       Hamu angka dongan sahaporseaon, : Selamat Ari Pentakosta ma di hita saluhutna: Sadarion, di na tahalashon Hasasaor ni Tondi Porbadia tu angka na porsea di Tuhan Jesus Kristus, dipaingot do hita asa unang olo hita  ela-elaon ni hagiot ni portibion. Ai naeng sirangon ni ido hita sian haluaon binoan ni Tuhanta. Tagogo  ma martangiang huhut tumangihon hata ni Debata ganup ari. nungga di gohi Debata bagabagaNa  mangalehon Tondi Parbadia songgop tu angka siseanNa dohot saluhut angka naporsea di Ibana.

H:        PINUJI MA TUHAN I NA MANGUSEHON TONDINA TU GANUP ANGKA NA PORSEA DI IBANA.

U :       Ibana do na paluahon jala manjou hita marhitehite panjouon na badia. Alani i ma dibagasan hiras ni roha, taolophon ma Ibana mardongan arbab nang sarune, jala nasa na marhosa ingkon mamuji Jahowa. Taendehon ma “ O Tondi Parbadia i”

H :       (mangendehon) BE. No. 102:1 “O Tondi Parbadia i” BL. 206

O Tondi Parbadia i bongoti rohanami be ro sipatiur roha. O sondang sian surgo i sondangi rohanami be tu halalas ni roha. Asa masa patupahon pinodahon ni hataMu sai tu hami ma rohaM

U:        Di parngingotan Ari haroro ni tondi Parbadia sadarion, paimbaruhon  parningotanta di lehon Debata do TondiNa mangingani, paimbaruhon dohot margogoihon hita asa mangolo i Ibana.

H :       Tu TondiMi Tuhan hulehon diringkon, sai tong ma di rajai sandok pamatanghon.

U       :             Tapangiar ma soaranta mamuji Debata, Marende hita sian  BE. No. 640 : 1-3.

II.                IBADAH.

1.               MARENDE BE No. 640 : 1 – 3 “Haholongon Sian Ginjang”     BL.640

     ^♫♪♫         Haholongan sian ginjang las ni roha na hot i

                  Tumpal ni asi ni roha sai bongoti rohangki,

                  Jesus na gok asi roha dohot haholongon i

                  Baen malua baen martua hami natahutan i

                                                        ^♫♪♫ Lehon tondi haholongon tu parroha na bojok

                                         Baga-baga hadameon sahat baen tu hami on

                                         Jesus Alpha nang Omega bona ni haporseaon

                                        Sai padao ma angka dosa, sai palua hami on.

                           (Jongjong)

                               ^♫♪♫ Sipalua na sun gogo lehon tu au ngoluMi

         Ro ma Ho sai marsihohot mangingani joroMi

         Asa Ho husomba hami raphon pardisurgo i

         Rap mamuji mangoloi, Ho di hasangaponMi.

2.              VOTUM – INTROITUS – TANGIANG

U:                     Marhitehite Goar ni Debata Ama dohot Goar ni AnakNa, Tuhan Jesus Kristus dohot Goar ni Tondi Parbadia, na tumompa langit dohot tano on.

R:             Amen

U:                     Sian Sion, situan ni hinadenggan, marsinondang Debata. Sai na ro do Debata, jala ndang tagamon hohom Ibana; ai songon on do didok Jahowa:

R:                    UsehononKu ma aek tu angka na mauas dohot angka sunge tu na mahiang. UsehononKu ma tutu TondingKu tu pinomparmuna nuaeng jala pasupasungKu tu pinomparmu sogot.

U:                    Jahowa do Debata, jala Ibana manondangi hita. Tambathon hamu ma angka pelean pesta I  sahat ro di angka tanduk ni langgatan. HALELUYA

R:             [mangendehon] Haleluya, haleluya, haleluya.

U:                     Martangiang ma hita! Ale Tuhan Jesus. Hudok hami mauliate tu Ho sian nasa rohanami, ala dipaojak Ho huriaM di tano on, jala ala dohot hami dijou Ho tusi. Sai suru ma Tondi Parbadia tu rohanami, asa tung huparhatopot hami Ho hangoluannami, asa lohot tu Ho hami marhitehite haporseaon na sintong, jala asa tongtong huhalashon hami pasangaphon GoarMu, na tarpuji ro di salelenglengna. Amen.

(Hundul)

3.                               Koor :  

4.              MARENDE BE. No. 103 :  3 “ O Pangapul na Lumobi”    BL.80

               ^♫♪♫     O Pangapul na lumobi , Tondi ni Tuhan i,  Rohangkon bongoti.

                      Diparbaga Tuhannami, ingkon Ho do na ro  mangajari hami.

                ^♫♪♫         Ho disomba rohanami, sai asi rohaMi  paimbaru hami.

                        Lam tangkas ma patandahon, jorbut ni dosa i situndalhononhon.

5.              PATIK:  

U:        Tangihon hamu ma Patik ni Debata, i ma na tarsurat di Confessi HKBP Bindu 3  HKBP TARINGOT TU TONDI PORBADIA   (BINDU 3 C )

            Hamu angka dongan sahaporseaon, itaparata ma jolo parningotanta di Konfessi ni hurianta HKBP taringot tu Tondi Porbadia dohot  ruhut-ruhut parhuriaon di HKBP, asa unang lipe pangantusionta, alai asa lam dasip ngolu parhuriaonta di HKBP anggiat marsangap goar ni Tuhanta marhite panghatindanghononta nang pangalahonta maradophon Debata Jahowa.

a. Tondi Porbadia

Tahaporseai jala tahatindanghon do: Debata Tondi Porbadia do na manjou, mangajari huria i jala patongtonghon di bagasan haporseaon dohot habadiaon di bagasan Barita Nauli bahen hasangaponni Debata. Marhite on taalo jala tatulak do poda na mandok :

H :       Boi do songgop Tondi Porbadia tu jolma marhitehite panghobasion nasida sandiri so pola marhitehite sian Barita Nauli?”.

U:        Laos songon i ta alo jala ta tulak do poda na mandok : “Holan marhitehite na siarsiaran dohot na marhata sileban do songgop Tondi Porbadia”.

H :       Laos songon i ta tulak jala ta alo do poda na mandok :  Na so pola ringkot marubat, sae do molo holan martangiang tu Tondi Porbadia. Jala na mambahen panurirangon gapgap mangasahon Tondi Porbadia.

U:        Laos songon i parsaoran na masalpuhu, na matorbanghu, ala naung digohi Tondi Porbadia, ninna. Sudena  ta alo jala tatulak on, i ma angka poda na mangasahon Goar ni Tondi Porbadia di na so ture dalanna. Marhite pangajarion ni Tondi Porbadia, Ima sahatna antong rap mangido gogo ma hita sian Tuhan Debata

U+H: Ale Tuhan Debata, sai pargogoi ma hami mangulahon na hombar tu PatikMi. Amen

6.            KOOR :

7.              MARENDE BE No. 164 : 3 – 4 “O Tuhan Jesus Ho Rajangku”    BL. 107

                ^♫♪♫ O Jesus na marasiroha disaluhut pardosa i,

                    Ondihon hami ai naeng jora do hami mangulahon i

                   Sai sesa dosanami i, marhitehite mudarMi.

                                               (Jongjong)

                ^♫♪♫ Sai lehon ma tu tondinami TondiM na sun badia  i

                       Ibana mangajari  hami mangaradoti  patikMi

                        Parbadiai ma hami be marhitehite mudarMi.

8.              MANOPOTI DOSA

U:      Hita ruas ni Tuhanta. Na jongjong do hita nuaeng di jolo ni Debata na umboto saluhut. Antong, tapatedekma tu adopanNa nasa pangalaosionta di patikNa. Tatopoti ma nasa dosanta. :  Martangiang ma hita! Ale Tuhan Debata Amanami Jesus Kristus Tuhannami. Huparhatopot hami ma saluhut pangalaosionnami tu Ho. Mansai jotjot huarsahi hami Ho marhitehite pingkiran dohot hata dohot pambahenannami na roa i. Ndang huhaholongi hami Ho sian nasa rohanami dohot nasa ateatenami dohot nasa tondinami dohot nasa gogonami, nang dongannami ndang doshon dirinami hubahen hami.

                            — hohom/organ BE.171 “Tandai Ma Au —

H:      Nunga mardosa hami dompak Ho, ale Tuhan. Ai holan di tingki lomo do rohanami huulahon hami na denggan tu dongannami. Jotjot do hami manirpang sian patikMu, sipata holan hagiot pardagingon do hupasarisari hami. Jotjot hami ndang parduli di hataM, gabe sai humasusa hami pasarisari na ringkot di ngolunami. Lupa hami mangalualu tu Ho. Ale Tuhan, asi ma rohaM, marpamuati ma RohaM mida dosanami i. Asi ma roham di hami. Sesa ma dosanami.

R     :           (Mangendehon) BE 171 :  ”Tandai Ma Au”

Tandai ma au! Sungkapi ma dohot rohangku

Uji ma au, pamanat huhut ma dalanku, olo di tanda Ho au Debata!

U:        Na maporus ma hami nuaeng tu asi ni rohaM na godang i, mangido sian nasa rohanami hasesaan ni dosanami saluhutna. Sai urupi ma hami paubahon rohanami asa imbaru parange dohot parulan nami saleleng di tano on do pe hami. Tung marungkil situtu do ngolunami ditingkion ala ni dosa na huulahon hami. Masa parmusuon na marluat di bangso nami on hinorhon ni naso masiantusan; masa angka bencana alam banjir, lalo, dohot angka tano na marobung, hinorhon ni tangan na marlomolomo mangahut paruntungan. Lupa do hami manjaga haulion ni jadijadion ni tanganMu. Ale Tuhan, asi ma rohaM, marpamuati ma RohaM mida dosanami i. Asi ma roham di hami. Sesa ma dosanami.

— hohom/organ BE.171 “Tandai Ma Au —

U:        Ale Tuhan! Nuaeng huanggukhon hami ma saluhut dosanami di adopanMu. Tatap ma hami na marsitaonon, ala ni ulaon nami na so ture. Godang sian tongatoga ni ruasmu na marungkil, ala ni ngolu parianakhonon. Godang sian tongatonga ni ianakhon ni huriaM na mandele, ala ni borat ni mangulului karejo. Godang sian tongatonga ni natoras na mandele, marungkil mamingkiri hinaborat ni biaya parsikkolaan na lam tu timbona. Sipata Loja do hami mangalului parsalian alai ndang jumpang, hudioari hami ulaon tu dolok tu toruan, alai ndang tuk paulak hosa Loja. Pola do sipata… ndang boi tarpodom hami dipodoman nami mamingkiri angka na porlu dibagasan ngolu on. Ale Tuhan, asi ma rohaM, marpamuati ma RohaM mida dosanami i. Asi ma roham di hami. Sesa ma dosanami.

R  : (Mangendehon) BE. 171 :  ”Tandai Ma Au”

Asi ma roham, Taringot tu pangalahonku, Olo, tutu,

Jotjot do na lilu dalanku, sesa dosangku sude, Debata!

U:        Bagabaga ni Debata taringot tu hasesaan ni dosanta. Molo tung adong manang ise na mardosa adong do pangondionta di Ama i, ima Tuhan Jesus Kristus na tigor roha i. Ibana do pardengganan taringot tu dosanta, alai ndada holan taringot tu dosanta dohot do taringot tu dosa ni saluhut portibi on. Hasangapon ma di Debata na di Ginjang

H:         Amen

9.                               KOOR

10.           MARENDE BE No. 106 :  6  “ALE TUHAN AMANAMI”  BL. 176

                                ^♫♪♫   Tondi, sai ajari ahu jala togutogu ma. 

       Asa au marpangalaho na badia na tama.

       Sai paburju  rohangkon mangoloi hataM tongtong.

       Asa molo ro ajalhu sahat tu ingananMu.

11.            EPISTEL:  Kolose 3:5-11

U:                    Hata ni Debata turpuk Epistel di pestanta sadari on, na tarsurat Kolose 3:5-11 Antong, bunu hamu ma ruasmuna, angka na di tano on: parmainanon, hahodaron, riting ni roha, hisaphisap na roa, ro di pangahution, i ma pardebataon na leban.

H:             Ala ni angka i do lalu rimas ni Debata.

U:             Diulahon hamu do angka i najolo, tagan di bagasan i ngolumuna.

H:                    Alai anggo nuaeng, bolongkon hamu ma saluhutna i: Rimas, muruk, hajahaton, panginsahion hata barangsi sian pamanganmuna!

U:                    Unang ma masigabusan hamu, ai nunga ditanggal hamu jolma na buruk i rap dohot angka parulaonna,

H:                    jala nunga disolukkon hamu na imbaru i, na pinaimbaru, asa tandaonna rupa ni na tumompa ibana.

U:             Ndang mardiaimbar disi Junani manang Jahudi, na marsunat manang na so marsunat, bangso na leban manang bangso na so maju dope, hatoban manang anak mata; Kristus i do tahe saluhutna jala di bagasan saluhutna.

       I do sahatna. Martua do angka na tumangihon Hata ni Debata, jala na umpeopsa.

H:            Amen.

12.           MARENDE BE No. 102 : 1  - 2  “O Tondi Porbadia i Bongoti”   BL. 206

      ^♫♪♫   O Tondi Parbadia i  Bongoti rohanami be Ro, Sipatiur roha

          O Sondang sian surgo i Sondangi rohanami be Tu halalas ni roha.

         Asa masa Patupahon pinodahon ni hataMu Sai tu hami ma rohaMu.

(Jongjong)

       ^♫♪♫   Ho do silehon roha i  di nasa na porsea i, tumpahi rohanami.

                  Patogu rohanami be, pasar hataM  tu sasude,  sai tong dongani hami.

                  On pe sude parrohaon, hatuaon lehononMu,  sipujion do goarMu                                                           

13.            MANGHATINDANGHON HAPORSEAON

U       : Rap ma hita manghatindanghon haporseaonta i songon panghatindanghonon ni donganta sahaporseaon di sandok portibi on, rap ma hita mandok.

       H       : Ahu porsea ...                                                      (Hundul)

14.           TINGTING      

15.           MARENDE BE No. 461 : 1 – 3  “Songgop tu Hami” . Logu. 407.   

(Pelean Ia + Ib)

      ^♫♪♫   Songgop tu hami na di joloMon, o tondi, ni Debatangki.

          Uhir patikMu tu rohangkinon, O Tondi  ni Debatangki.

          Bereng siholhu di haroroMi, molo Ho ro, nda hisar ton-dingki.

          Didihon ma tu au on apiMi. O Tondi ni Debatangki.

      ^♫♪♫   Suru TondiM paluahon au on. palua ma, o Debata.

           Bereng dagingku, tondingku dison, palua ma, o Debata.

          Dao ma pangambat di soaraMi, hisap ni daging, sandok diringki,

          Na mangarsahi tongtong TondiMi. Palua ma, o Debata.

------------ MUSIK---------

  ^♫♪♫        Lehon hataM, i  ma tau podangki, Debatangki na gogo i,

          Asa sai talu sude musuMi. Debatangki na gogo i.

           Mangkatindangkon tongtong goarMi, asa malua pardosa disi.

          Asa dijangkon Tuhanta ma i. Debatangki na gogo i.

16.           JAMITA  :   Roma 8:9-11

17.           MARENDE  BE No. 104 : 1… “Bongoti Ma Rohangku”    BL. 155

(Pelean II: Pelean tu tu Ulaon Pekabaran Injil/Zending)

                                  ^♫♪♫     Bongoti ma rohangku, ingani ma au on.

                          O Tondi Debatangku, pasonang rohangkon.

                           Na marhabangsa Ho raphon Debata Ama,

                           Nang Jesus pe AnakNa, naeng pujionku Ho.

 ^♫♪♫        Antong  panghilalahon tu ahu gogoMi,

                         GogoM ma paluahon au sian dosangki.

                         Urasi rohangkon, paias ma tondingku 

                        Ai naeng  do oloanhu na nidokMi tongtong.

                 ------------    M U S I K  --------------

                                                                              ^♫♪♫ Ndang dung marhatigoran pardosa au hian

                     Ndang dung marhasonangan na mate au hian

                     Di pandidion i dibonom Ho  dosangku 

                    Tu mudar ni Tuhanku, ias au ala ni.

                                 ^♫♪♫ O Tondi Sipodahon tangiang na sintong

                              Ho do na tinangihon ni Ama i tongtong.

                         Ajari ma au on mandok pangidoanhu

                         Sian sandok rohangku, tangihon hatangkon.

                 ------------    M U S I K  --------------

                                                                                  ^♫♪♫ Silehon las ni roha palas ma rohangki

                    Pahehe au paboa au niapulanMi

                    Jotjot ditopot Ho angka na marsitaonon

               Silehon hasonangan tu na tungki do Ho.

                                         ^♪♫ Usehon tu rohangku holong ni rohaMi

                             Padenggan ma hatangku tu dongan sasude

                            Asi rohaM padao ma bada, halatean

                            Patimbul hadamean na roa i palao.

        ------------    M U S I K  --------------

            ^♫♪♫      Baen gok haporseaon ma rohanami be;

               PanumpakMi gandahon tu artanami pe.

               Pabali tondi i na olo manundati,

               Na olo mangarsahi RohaM na denggan i.

18. PARSURUON:                 (Jongjong)

      U :                                                                                   Sadarion, di naung tahalashon Hasasaor ni Tondi Parbadia, dipaingot do hita asa tangkas taboto dohot do nang hita disonggopi Tondi ni Debata Nabadia i. Dung i lam tangkas ma di hita haesaan ni dosanta. Mian ma hita dibagasanTondi ni Debata , asa taboto marparange na imbaru marhite na mangulahon hombar parbue ni Tondi i, ima :

     H  :   Holong dohot las ni roha, dame dohot lambas ni roha, habasaron, habasaon, haporseaon, halambohon dohot hatomanon.

     U  :                                                                                    Lam hisar mahaporseaonta, ai ido dipangido Debata sian angka naung manjalo Tondi Parbadia na paimbaruhon i lam manggogo  mangulahon  na denggan tu saluhut halak asa marsangap goar ni Tuhan i marhite pambahenanta.

     H  :   Sai papulik rohanami gabe pangoloi di, asa marsahala hami lao manghatindanghon Ho.

     U :   Tondi Parbadia  do na patauhon hita mangulahon nasa ulaon na denggan.  Mulak ma hita mandapothon ulaonta dohot ingananta be di bagasan gogo dohot habisuhon na sian Tondi Parbadia. Tapatulus ma nasa ulaonta huhut ingot ma hita pasahathon ngolunta tu Debata, laos tasoarahon ma: “sai guru di lomoMi ma au mian dison, di tano on.

      U+H : Mangendehon BE. No. 523 : 2 “ Songgop tu hami.” BL.407

                   ^♫♪♫     Sai guru dilomoMi ma au on :,: Mian dison :,:

Butbut na jat, baen ias rohangkon :,: Ditano on :,:

Holong rohangku di Jesus tongtong, nang hahanggi di portibi on

Sai na managam do rohangkinon, di haroroM tu tano on.

19. Tangiang Panutup.                                                          

       P   :      Tatangianghon ma peleanta tu jolo ni Debata :  Agenda HKBP.

      H   :     ( Mangendehon Ende Pelean  )

                  Nasa na nilehonMi Tondi ro di pamatangku. Hosa dohot gogongki ro di saluhut artangku. Hupasahat i tu Ho, naso unsatongku do.

      U   :     Tangiang Haroro ni Tondi Parbadia …..Tangiang Ale Amanami...................

       H   :      ( Mangendehon : Ai Ho do nampuna harajaon ……) 

       U  :    Pasu-pasu........Amen.....Amen.....Amen.

SELAMAT MERAYAKAN HARI PENTAKOSTA

TUHAN MEMBERKATI

bidangmarturiahkbpdistrikvidairi.blogspot.com