Acara Parningotan Haheheon ni Tuhanta Jesus Kristus Paskah I HKBP Distrik VI Dairi

Topik :         “Haporseai ma Kristus naung Hehe i”

1.    Pangaradeon

 ( Ditingki mardalan Prosesi, Musik dohot Song Leader Mangendehon BE 632:1)

2. Joujou tu Parsaoran dohot Debata

U:        Huria ni Tuhanta ! Tolhas ma hita nuaeng tu Pesta na bolon, di na marningot hita di ari haheheon ni Tuhan Jesus Kristus sian hamatean. Ala ni i, jumolo ma pinasahat tabe : Selamat ari Paskah ma di hita   saluhutna.

R :       Selamat Ari Paskah !

U :       Puji ma Jahowa ale tondingku, jala unang tung halupahon denggan ni basaNa sudeNa. Ndang hasuhatan saluhut pambahenan ni Debata naung mangaroro hita sian linggoman ni hamatean. Ala ni i, olophon ma haheheon ni Tuhan i, ai marhite Haheheon ni Jesus dapot hita haluaon di bagasan asi ni rohaNa na godang i.  Tapuji ma Debata ala pambahenanNa na so hasuhatan i.

R:        Patimbul ma Jahowa ale Tondingku, ala naung hehe Jesus i.

U:        Nunga tarbondut hamatean; nunga soluk  hamonangan.

R:        Jo hamatean, didia hamonanganmi? Jo hamatean, didia soropmi?

U:        On pe hamu angka donganhu na hinaholongan, marsihohot jala so mubauba ma hamu jala lam sumurung ma tongtong di bagasan Tuhan i. Endehon ma, haleluya, nunga hehe Kristus i.

3. Marende No. 633: 1-2,4   “Nunga hehe Kristus i”     BL. 633

Nunga hehe Kristus i haleluya  sian hamatean i haleluya

Parlangitan jouhon ma haleluya,  tano on alusi ma, haleluya

Singkop panghophopNa i, haleluya Gok hamonanganNa i, haleluya

Sondang haluaon i, haleluya Patiur dalanta i, haleluya

                                    ----- organ -----   (-----jongjong -----)

Monang do Tuhanta i, haleluya  Talu hamatean i, haleluya

Mago do soropna i, haleluya Ala monang Tuhan i, haleluya

4. Votum- Introitus :

U:        Marhitehite Goar ni Debata Ama dohot Goar ni  AnakNa Tuhan Jesus Kristus dohot Goar ni Tondi porbadia na tumompa langit dohot tano on.

R :       Amen

U:        Unang ho mabiar, Ahu do bonana dohot ujungna. Na mangolu do, jala naung mate do Ahu najolo jala ida ma, Ahu do na mangolu ro di saleleng ni lelengna Jala di Ahu do anakhinsu ni banua toru dohot hamatean.

R:           Haleluya ! Di Tuhan Debatanta i do hatuaon dohot  hasangapon dohot hamuliaon dohot hagogoon.

U:           Na pahehehon Tuhan Jesus, i do na pahehehon dohot hita sogot ala ni Tuhan Jesus. Nunga hehe Tuhan i, nunga tutu hehe Ibana Haleluya

R:           Mangendehon: Haleluya, haleluya, haleluya.

U:           Martangiang ma hita:

Ale Tuhan Jesus, Tuhannami! Na mandok mauliate do hami tu Ho, ala di taluhon Ho do dosa dohot hamatean marhitehite hamamateM i, ala disondangi Ho tanomannami, asa marpangkirimon na mangolu hami ala ni haheheonMi. Ndang pola be mabiar hami mida hamatean, ai Ho do ulunami, ruasMu do hami. Dipaunsat Ho do hami sian haholomon tu hatiuron, sian hamatean tu hangoluan. Antong pargogoi ma hami mamuji dohot mangoloi Ho ariari, pasangaphon Ho di bagasan haporseaon na mangolu, paima sahat hami tu lambungMu. Amen.   

5. Marende No. 93:1-2  Pesta Paskah Hatuaon                     BL. 91

Pesta Paskah hatuaon, Pesta Paskah haluaon

            Sian hamatean I, Tuhan Jesus do pasuang

Hangoluan, hasonangan, Tu saluhut jolma i.                        

                        Talu ho banuatoru, ndang tarbahen tiopanmu

                        Raja Siparngolu i. Hamatean, hamagoan

                        Na so pola habiaran, nunga talu i sude

6. Patik ni Debata

U:        Patik ni Debata sihangoluhononta di pestanta sadari on ima na tarsurat di Epesus 1:11-12 : Ai di bagasan Ibana do dapotan partalian hita, angka naung tinodona hian, marguru tu tahi ni na patulushon sasude, mangihuthon pandok ni rohana,

H:      Asa tarpuji hasangaponna marhitehite hita, angka naung mangkirim hian di Kristus

U:        I do sahatna. Antong rap mangido gogo ma hita tu Debata

U+R:   Ale Tuhan Debata, sai pargogoi ma hami mangulahon na hombar tu PatikMi. Amen.

7. Koor

8. Marende B.E No. 89 : 1+5  “Ate didia soropmi”                BL.130

Ate di dia soropMi Nuaeng, o hamatean ?

            Di dia hamonanganmi Nuaeng banuatoru ?

            Na talu do hamu sude Na talu do sibolis pe Ai ditaluhon Jesus

                          (----- jongjong ----- )

             Ai manang ise na burju Paubahon rohana 

             Na mangalehon situtu Di Jesus i rohana 

             I do dongan ni  Jesus i, tumean hangoluan i Saleleng ni lelengna.

9.   Joujou panopotion ni dosa – Pangarimangon Pangalaho

(U: Uluan, A: Ama , I: Ina ; Nps : Naposo )

U:        Tapaunduk ma rohanta di adopan ni Debata manopoti saluhut angka dosa, hahurangan marhite angka hata, pambahenan dohot pangalahonta na so tama. Tapatedek ma saluhutna di adopanNa na badia i. Unang huphupi dosam, alai solsoli ma saluhutna pambahenanmu na so tama.....

(----- organ angonangon mangendehon BE.No.182:1,  BL.24-----)

U :       Ale Tuhan Debata, hupatedek hami do diadopanMu sadarion angka pambahenannami na manghasogohon rohaM. Tung jotjot do hutuntun hami mardosa atik pe huboto hami nunga maralo tu lomo ni rohaM. Mansai gogo do hisaphisap ni daging dohot tubutubu ni rohanami mangelaela hami mardosa, gabe marroha mago hami. Ala ni dosa i, gabe sega angka parsaoran na denggan. Disegai dosa i do parsaoran di tonga ni huta, di tonga ni huria, di tonga ni parsaripeon, parhahamaranggion dohot angka parsaoran na asing. Tading do angka ulaon na ringkot binahen ni angka hariburon na mangalalapi hajolmaon, mambahen hami lam dao sian Ho...

Ama:   Hami angka horong Ama, tarjou do hami nian gabe malim di tongatonga ni keluarga dohot masyarakat. Nda ingkon manogunogu jala tiruan ma hami nian di ianakhonnami dohot na humaliang ? Alai jotjotnai husoadahon hami ulaon hamalimon i, gabe lupa hami mangaradoti partondion ni angka sundut na umposo. Ai godang tingkinami na ambolong lalap di parlalapan, manang marondingonding di balik ni rongking ni ulaon siganup ari, gabe sidalianta i pasiding turgas panogunoguon ni ianakhon.

Ina :     Hami angka horong Ina, tarjou do hami gabe ina pangajari di tongatonga ni keluarga. Alai tung jotjot do huparsidalianhon hami hapogoson, rongking ni ulaon, ulaon adat dohot angka na asing, gabe ndang huhalaputi hami manogunogu ianakhonnami mananda lomo ni rohaM. Di na deba hulehon hami do angka na pinangido ni rohanasida isara ni angka rumang ni hamajuon jaman dohot tekhnologi, alai ndang huparmahan hami nasida, gabe godang nasida disoro tonditondi ni jaman na maotaot i.

Nps:     Hami angka Naposobulung ni huriaM, jotjot do hulaosi hami poda ni natorasnami. Tuminggil do sipareonnami di rumang ni hamajuon dohot hariburon sian na tumangihon hataM. Madabu do hami tu kenakalan, tarelaela mangihuthon hamajuon ni jaman, mambahen hami lalap di parmeaman, gabe godang tingki na ambolong.

U :       Ale Tuhan...! Tangihon ma, nunga hupatedek hami angka hahurangannami di joloM, Ama, Ina, Naposobulung pe, mansai jotjot huarsahi hami Ho ala ni pambahenannami na roa i. Ala ni i, asi ma rohaM. Unang jujur angka hahurangannami i. Sai patubu ma roha na manolsoli di hami asa hupauba hami pangalahonami i. Ale Tuhan, nunga disesa Ho dosanami, jala dipadiri Ho di hami hangoluan na manongtong marhite hamamate dohot haheheonMi sian na mate, ala ni i, huradoti hami ma panghophoponMi di hami marhite parange na marhaimbaruon.

            (-----organ angonangon mangendehon BE.No. 183 : 1, BL.105----)

U:        Bagabaga ni Debata taringot tu hasesaan ni dosanta, Songon sintong na mangolu Ahu, ninna Tuhan Jahowa. Tung na so lomo do rohangHu mida hamatean ni parjahat, na lomo do rohangKu mida hamumulak ni parjahat i tumadingkon dalanna, asa mangolu ibana. Hasangapon ma di Debata na di ginjang.

R:        Amen.

10. Marende No. 627 :  1 – 2   “Jesus naung hehe”     BL. 627  

Jesus naung hehe, haleluya, puji endehon haleluya

Hamonagan ni Tuhanta i, namanaluhon sibolis i

Reff.:   Las ma roham puji ma Tuhan i, ala naung talu hamatean i

Sesa dosanta haleluya, mangolu Jesus haleluya

            Di ari na patoluhon i, maloha do tanomanNa i

            Jesus Raja hangoluan i, na patundukhon sibolis i

            Ref: Las ma roham….

11. Epistel : Psalmen 21:1-7  

U :       Epistel di Pesta Lasni rohanta sadarion ima na tarsurat di Psalmen 21:1-7 songonon ma didok disi  Ende sian si Daud.

H:      Ale Jahowa, marlas ni roha do rajai mida gogom, jala marolopolop situtu do ibana mida panumpahim.

U:     Dilehon Ho do tu ibana pinangido ni rohana, jala ndang dijua Ho pinangido ni hatana. Sela.

H:      Ai ditomutomuhon Ho do tu ibana angka pasupasu ni hadoharon, ditalitalihon Ho do tu uluna tumpal sere palangki.

U:      Hangoluan do dipangido sian Ho, dilehon Ho do tu ibana, diudut Ho do ariarina ro di salelenglelengna.

H:      Timbul do hamuliaonna dibahen panumpahim; hatongamon dohot hatimbulon diampehon Ho tu ibana.

U:   Ai * parhitean ni angka pasupasu do ibana dibahen Ho salelenglelengna, dipasabam Ho do rohana marhitehite * las ni roha mida bohim

U :       Disi ma sahatna, Martua ma na tumangihon Hata ni Debata jala na umpeopsa. 

      R :       Amen. !

12. Koor :
13. RENUNGAN SITUASIONAL ( U:Uluan; P: Parompuan )

U:   Huria ni Tuhanta, Ia angka Boruboru lao do tu tanomani , dang disi be Tuhan Jesus nunga hehe sian I, Haleluya haleluya nunga hehe siani, tarjou do hita angka parompuan tarlumobi angka ina laho marbarita nauli pasahathon barita haheheon ni Tuhani jala laos disoarahon do tu angka ina. Hombar tu na tarsurat di 1 Petrus 4:4, mandok Ina soripada ndada holan na pajagarjagarhon haulion parduru, alai tarlumobi haulion roha parbagasan do..

P : Ale Tuhan lehon ma di hami roha na uli laho mangkobasi ulaonnami di keluarga, masyarakat nang Huria.

U :  Tarjou do angka Ina asa  gabe ina sipartangiang songon si Hanna na pasahathon sude pangidoanna tu Debata marhitehite tangiang. Ndang mansohot ibana marpangidoan, jala dang marnaloja ibana martangiang.

P :  Ale Tuhan Debata sai pahot ma rohanami on asa gabe ina sipartangiang hami di tonga ni bagas nami.

U :  Tangan ni angka ina soripada manetekhon hangoluan tu ianakhonna, songon tangan ni si Maria na manjagai Jesus na sorang di atas panggagatan jala di bara ni pinahan. Hapadoton dohot lambok ni tangan ni sahalak ina soripada do na manetekhon hangoluan tu angka ianakhonna.

P :  Ale Tuhan sai pasupasu ma tangannami on, asa anggiat padot hami di ulaon na denggan jala lambok tangannami on manogunogu ianakhonnami.

U :  Songoni ma nang hamu saluhut Ama-Ina-Naposo Bulung, marsibahen na denggan ma hamu sama hamu, pareahi hamu ma ngolu na marlas ni roha jala na mardame. Pos ma rohamuna Tuhanta i do mamasumasu nasa ulaonta nang saluhut pangisi ni bagasta.

P:   Ale Tuhan pargogoi ma hami patupahon ulaon na denggan, jala pasahat ma tu hami pasupasuMi. Amen

14. Koor :

15. Marende No. 91: 1 – 2    “Hatuaon do”                  BL. 55

Hatuaon do, las ni roha do hangongot ni Tuhanta i

            Mago do hita, ngot ma Tuhanta, las be, las be ma rohanta i 2x

                                                (----- jongjong -----)

            Hatuaon do las ni roha do hangongot ni Tuhanta i

            Monang do Jesus, talu sibolis, las be, las be ma rohanta i 2x

16. Manghatindanghon Haporseaon

U :       Rap dohot donganta sahaporseaon di sandok portibi on, tahatindanghon ma haporseaonta i :

U+H:   Ahu porsea di Debata Jahowa……….dun.  Amen! (---hundul...)

17. Koor

18. Tingting

19. Tangiang Pangondianon

20. Marende No. 94 : 1 – 3   “Ale Tondingku Naung Hehe”                BL.44

(P. Pelean Ia, b)

Ale tondingku  naung hehe Tuhanmu, nunga ditaban do banua toru

            Las ma roham ai martua ma ho, rap dohot Jesus mangolu ma ho

rap dohot Jesus mangolu ma ho

……….Organ………..

Talu sibolis dibahen Tuhanta, nang hamatean nang dosa sudena

Sai dihalashon rohanta  ma i, pangoluonNa do hita sude

pangoluonNa do hita sude

……….Organ………..

Tahaburjuhon mangalo dosanta, Jala tabaen Tuhan Jesus donganta

Pos ma rohanta di Tuhanta i, pamonangonNa do hita sude

pamonangonNa do hita sude

21. Jamita : Johannes 20:24-31

22. Marende No. 96 : 1 – 3   “Nunga talu hamatean”               BL. 101

(Pelean II – Pelean tu Kategori Parompuan HKBP)

Nunga talu hamatean dibaen Tuhan Jesus i, Ai naung hehe  do Ibana sian hamatean i.....Haleluya, haleluya, nunga hehe Jesus i

Haleluya, haleluya, nunga hehe Jesus i

                                     ……………Organ…………..

Ia angka boruboru lao do tu tanoman i, ndang sisi be Tuhan Jesus, nunga hehe sian  i....Haaleluya, haleluya, nunga hehe Jesus i

Haleluya, haleluya, nunga hehe Jesus

                                    …………    Organ…………

Marlas roha be hita ala hehe Jesus i, Ai malua sude hita sian hamagoan i

Haleluya, haleluya, nunga hehe Jesus i, Haleluya, haleluya, nunga hehe Jesus i

23. Parsuruon manghangoluhon Hata ni Debata

U:        Hamonangan! i do nabinoan ni Tuhan Jesus marhite haheheonNa i. Laos hamonanganNa i do na gabe hamonanganta jala i do las ni rohanta di pestanta sadari on.   

R:        Tutu do Tuhan, nunga hehe Ho sian hamatean manghamonanghon hami jala porsea do hami, hami pe na dohot  do muse.  Ajari ma hami mangauhon panghophoponMi di hami asa lam margogo hami mangihuthon Ho di ngolunami

U:        Marhite Tondim na badia i ajari ma hami mangantusi dohot manghangoluhon hata dohot lomo ni rohaM. Parbadiai ma hami di bagasan hasintongan asa tung tarpauba hami rohanami jala tarpature hami ngolu dohot pangalahonami. Padungo ma hami ganup ari mangharinggashon nasa ulaon na denggan paboa na masihol jala malungun hami tu hangoluan na so ra suda na pinaradeM di angka na porsea di haheheonmu, Amen.

            R :       (mangendehon BE.635          “Ro Tuhan Jesus”)

                  Ro Tuhan Jesus Anak sasada, parasi roha, parholong I,

                  Mate Ibana humophop hita, rumar tanoman I ai hehe Jesus i.

                  Ala hehe Jesus ro do ari sogot mangolu au,

                  Ndang mabiar au huboto do

                  sonang au raphon Jesus,sonang ma au ala naung hehe Jesus i.

24. Tangiang Pelean (Agenda HKBP)

25. Tangiang Panutup

 

bidangmarturiahkbpdistrikvidairi.blogspot.com