PARTORDING NI ULAON DI PARPUNGUAN MANOGOT NI ARI HAHEHEON (BUHABUHA IJUK)

PARTORDING  NI ULAON

DI PARPUNGUAN MANOGOT NI ARI HAHEHEON

(BUHABUHA IJUK)

(U= Uluan                               R= Ruas                     S= Sude)

1.    Marende No. 90: 1-2 Sai marlas ni roha hita                     BL.17 

Sai tapuji Debatanta ale hajolmaon i

            Ai naung hehe do Tuhanta sian hamatean i

            Dipasidung Jesus i ulaonNa sasude

            Patupahon haluaon di saluhut hajolmaon

                        Anggo utang ni dosangku digarari Jesus i

                        I do haporseaonku di na tinaonNa i

                        Nunga tulus patik i, nunga mintop rimas i

                        Di na hehe i Ibana ro di au hangoluanna

2.    Votum – Introitus – Tangiang (Jongjong)

U:        Marhitehite goar ni Debata Ama, Anak dohot Tondi Porbadia na tumompa langit dohot tano.

R:        Amen!

U:        Ida ma, Debata do hatuaonku. Ibana huhaaposi, jadi ndang mabiar ahu, ai  Tuhan Jahowa do hagogoonku jala pujionku do na manadi hatuaon di ahu.

R:        Pinuji ma Debata Ama ni Tuhanta Jesus Kristus, na tumubuhon hita paduahalihon sian godang ni asi ni rohaNa tu pangkirimon na mangolu marhitehite haheheon ni Tuhan Jesus Kristus sian na mate.

U:        Nunga hehe Tuhan i, nunga tutu hehe Ibana. Ari on do najinadihon ni Jahowa, marolopolop jala marlas ni roha ma hita disi. Batu naung binolongkon ni angka pende bagas, i ma gabe batu parsuhi. Pinamasa ni Jahowa do i, halongangan do i anggo di matanta.

         R:        (Mangendehon) BE. 96  Nunga talu hamatean (Holan Reff)BL.101

                        Haleluya, haleluya nunga hehe Jesus i

                        Haleluya, haleluya, nunga hehe Jesus i

U:        Unang ho mabiar, Ahu do bonana dohot ujungna. Na mangolu do jala naung mate do Ahu najolo, jala ida ma, Ahu do na mangolu ro di saleleng ni lelengna, jala diAhu do anakhinsu ni banua toru dohot hamatean.

R:        (Mangendehon) BE. No. 96:1 Nunga talu HamateanBL. 101

                        Nunga talu hamatean dibaen Tuhan Jesus i

                        Ai naung hehe do Ibana songon nanidokNa i

                        Haleluya, haleluya nunga hehe Jesus i

                        Haleluya, haleluya  nunga hehe Jesus i

U :       Martangiang ma hita. Ale Tuhan Jesus Kristus naung hehe sian hamatean. Nunga ditaluhon Ho sorop ni hamatean i. Ndang tartiopi banuatoru Ho. Ai Ho do Tuhan ni na mangolu dohot na mate. Gahi ma las ni rohanami asa partohap hami di haheheonMi. Marsangap ma goarMu, sadarion, ro di saleleng ni lelengna, Amen

3.    Marende No. 92: 1, 5 Puji ma namanaluhon                      B.178 

Puji ma namanaluhon dosa hamatean i

            Puji ma na Pangoluhon saluhut pardosa i

            Jesus na dung mate I, las roham o huriana

            Ala na mamillit ho, Jesus I mangolu do

                        Tu tanoman si Maria paturehon bangkeMi

                        Tung beha ma di rohana dung dibege hataMi

                        Dohot mangalusi i? Au pe idaonku sogot

                        Ho di hasangaponMi, Ho, o Jesus Tuhanki

4.    Epistel: 1 Korintus 15:11-20

U:        Epistel di Hita ima natarsurat di 1 Korintus 15:11-20 Marsorinsoorin ma hita manjaha; Antong, manang ahu pe manang nasida, songon i do parjamitaonnami, jala songon i do gabe porsea hamu.

H:        Marhua ma dohonon ni na deba sian tongatongamuna, na so adong haheheon ni angka naung mate, dung sanga binaritahon taringot tu Kristus, paboa naung dipahehe Ibana sian na mate!

U:      Alai anggo so adong haheheon ni angka na mate, ndang na hehe nang Kristus.

H:        Ai anggo so hehe Kristus sian angka na mate, rumar ma jamitanami, laos rumar ma nang haporseaonmuna.

U:     Tardapot ma nang hami ala pargapgap di Debata, ala maralohon Debata huhatindangkon hami, naung dipahehe Kristus i, hape ndang dipahehe, anggo sandok so mulak mangolu angka na mate.

H:        Ai anggo so dipahehe angka na mate, ndang tutu hehe nang Kristus i.

U:      Alai anggo so dipahehe Kristus i, magopo ma haporseaonmuna, jala tong dope hamu di bagasan dosamuna,

H:       Gabe mago ma nang angka naung monding marhitehite Kristus.

U:        Anggo holan di tano on hita mangkirim di Kristus i, jolma na dumangol do hita sian saluhutna.

H:      Alai nunga hehe Kristus i sian na mate, Ibana do parjolo ni angka na monding i

U:        I do sahatna. Martua ma natumangihon Hata ni Debata jala na umpeopsa. Amen.

5.    Marende No. 89: 1,4  Ate Didia soropmi                 BL. 130

            Ate didia soropmi nuaeng o hamatean

            Didia hamonaganmi nuaeng banua toru

Na talu do hamu sude, na talu do sibolis pe

Ai ditaluhon Jesus     

                        Mangolu do Tuhanta i na hehe do Ibana

                        Ditaiti do ruasNa i mangihut tu Ibana

                        Ndang tinggal di tanoman i saluhut na porsea i

                        Di hata ni Tuhanta      

6.    Jamita : Mateus 28:1-10

7.    Marende No. 633:1-2

            Nunga hehe Kristus i, haleluya

            Sian hamatean i haleluya

            Parlangitan jouhon ma, haleluya

            Tano on alusi ma haleluya

                        Singkop panghophopNa i, haleluya

                        Gok hamonganNa i, haleluya

                        Sondang haluaon i, haleluya

                        Patiur dalanta i, haleluya

8.    Parsuruon

U:        Antong, las ma rohanta ala naung monang do Tuhanta i. nunga talu be hamatean i jala mago do soropna i ala haheheonNa i.

R:        Sangap ma di Tuhan i, pujionku ma goarNa na mambahen hamonanganta.

U:        Puji ma Ibana jala unang be ganggu rohamuna, nunga tutu hehe Ibana jala sai na hehe do luhutna ala huasoNa na sun gogo i. Martangiang ma hita: Ale Tuhan Jesus Tuhannami! Na mandok mauliate do hami tu Ho, ala ditaluhon Ho do dosa dohot hamatean marhitehite hamamateMi. Ala disondangi Ho tanomannami, asa marpangkirimon na mangolu hami ala ni haheheonMi. Ndang pola be mabiar hami mida hamatean, ai Ho do ulunami, ruasMu doo hami. Dipaunsat Ho do hami sian haholomon tu hatiuron, sian hamatean tu hangoluan. Aantong pargogoi ma hami mamuji dohot mangoloi Ho ariari, pasangaphon Ho di bagasan haporseaon na mangolu, paima sahat hami tu lambungMu. Amen. Rap mandok ma hita di tangiang Ale Amanami.

U+R:   Ale Amanami na di banua ginjang………….Amen  

U:        Tangiang Pasupasu.

R :       Mangendehon Amen...Amen...Amen...!

bidangmarturiahkbpdistrikvidairi.blogspot.com

Selamat Paskah