PELANTIKAN PANITIA PESTA PUNCAK TAON PARASINIROHAON HKBP DISTRIK VI DAIRI 2019

Jou-jou marsomba tu Debata:  U: Uluan; H: Huria

U:        Hamu angka nahinaholongan dibagasan Jesus Kristus, Horas-Selamat Ari    Minggu ma di hita saluhutna!

H:        H o r a s  ! Selamat Ari Minggu!

U:        Tama ma antong tapuji Tuhanta parasiroha i; ai tung sumurung do denggan ni basaNa tu hita. Diramoti jala di pargogoi do hita mangalangka, dohot mangulahon nasa siulaonta suang songoni nang di tongatonga ni hurianta HKBP Distrik VI Dairi on. Taon on ima Taon Orientasi Parasinirohaon HKBP, ala ni i na dohot do hurianta mangolophon i marhite na pabanghithon Parhobas di Ulaon Parasinirohaoni  ima na  pinamasa tongon di ari minggu on. Tahamauliatehon ma di Tuhan naung mandongani jala mampargogoi sude Ruas ni HuriaNa  asa marlas ni roha laho marhobas di huriaNai. Jala mardalan di Dalan ni Jahowa Pinuji ma Ibana! Marende ma hita !

2. Marende sian B.E No.581 : 1 + 3       “Sangap di Jahowa ”  BL 581

1.                  Sangap di jahowa na sun timbul i,

Balga ni holongNa ndang tarasam i,

Di lehon AnaklNa na sasada i,

manobus hita jolma pardosa i

Puji ma Debata ale manisia,

Las roham las roham somba ma Debata

Dapothon Jahowa na sun timbul i,

Marhite AnakNa Tuhan Jesus i

            ….Jolo Musik…. Dung i Jongjong……

2.                  Balga situtu pambaenMi Debata.

Tung so hasuhatan holong ni rohaM.

Tu jolma pardosa asi do rohaM,

Di ungkap Ho dalan lao tu banuaM.

Puji ma Debata ………

3.Votum - Introitus (Responsoria)      

U:        Marhitehite Goar ni Debata Ama dohot Goar ni AnakNa, Tuhan Jesus Kristus dohot Goar ni Tondi Parbadia, na tumompa langit dohot tano on.

H       :  A  m  e  n  !

U:        Ise do na jadi nangkok tu dolok ni Jahowa, jala ise do na jadi jongjong di hajongjongan ni habadiaonNa i? Halak Partangan na lidang dohot na ias roha. Haleluya!

H       : (mangendehon) Haleluya – Haleluya – Haleluya !

U:         Ale Tuhan, Debata, Pargogo na so hatudosan, Amanami saleleng ni lelengna! Asi ni rohaM do na mangaramoti hami sian nasailaon rasirasa nuaeng, jala asi ni rohaM do na mangalehon Barita na Uli i, gabe hangoluannami. Sai asi ma rohaM, sai buhai ma rohanami jala lehon TondiM na badia i, asa huantusi hami sude panogunoguM dohot pambahenanMu na balga i. Paian ma HataM dibagasan rohanami, asa mardame jala sonang hami jala imbaru rohanami marhitehite AnakMu, Tuhan Jesus Kristus Tuhannami.  Amen.                                        ---------- H u n d u l -------

4. Marende sian B.E No. 202: 2 “Huhahalongi ho gogongku”       BL. 102

Huhaholongi ho ngolungku Ai Ho do alealengki

 Sai naeng tongtong Ho pujionku Saleleng au sinondangMi

 Holong mamolin rohangki Di Ho o Jesuski.

5. Patik :

U:         Patik ni Debata di minggunta sadarion i ma Patik V Dohot Lapatanna

Ingkon pasangaponmu do natorasmu, asa martua ho jala leleng mangolu di tano na nilehon ni Jahowa Debatam di ho! Dia do lapatan ni i ?

H:        On do;  Ingkon dihabiari rohanta Debata jala ingkon holong rohanta di Ibana, asa unang lea rohanta mida natorasta dohot mida angka rajanta ro di angka natuatua. Ndang jadi paroonta rimas nasida, ingkon pantun do hita jala ingkon holong rohanta tu nasida, sioloan do nasida jala sisubuton do rohana!

 U:      Antong rap mangido gogo ma hita tu adopan ni Debata !

U+H:   Ale Tuhan Debata! Sai pargogoi ma hami mangulahon na hombar tu PatikMi. Amen!

6. Koor: INA DEBORA & NHKBP

7. Marende sian B.E No. 118 : 2    “Paian Ma di Hami”                    BL. 6

Ø   Paian Tuhannami HataM di hami be. Asa martua hami nuaeng nang sogot pe.

8. Marningot Denggan Basa Ni Debata

 U:       Puji ma Debata na manompa saluhutna, puji ma Ibana na mangaramoti ngolunta. Puji ma Ibana, ai ro di saleleng ni lelengna do asi ni rohaNa.

 H:       Tung na balga do asi ni rohaM Tuhan, alanii pujionnami ma Ho di tongatonga ni ngolunami.

 U:       Hamu angka dongan, tadok ma mauliate ala tongtong do di ramoti Tuhan i hita ganup marsadasada,

H:        Tung na balga do asi ni rohaMi Tuhan, alanii pujionnami ma Ho di tongatonga ni ngolunami.

 U:       Di lehon Ibana do di hita angka na ringkot i di ngolunta, ganup ari ganup tingki. Di lehon do di hita gogo, pos ni roha dohot panghirimon laho mangalului ngolungolu.

 H:       Tung na balga do asi ni rohaMi Tuhan, alanii pujionnami ma Ho di tongatonga ni ngolunami.

 U:       Tutu, ragam do angka na masa na boi mambaen hita mabiar mandalani ngolu  di taon naung tabolus i. Ragam do nang angka na masa na boi mambaen hita marungkil di tongatonga ni parngoluon i. Alai, saluhutna do manumpak tu na denggan di angka na marholong ni roha di Debata.

 H:       Tung na balga do asi ni rohaMi Tuhan, alani I mardalan ma hami di Dalan ni Jahowa

 U:        Sada taon Dilehon dihita ima taon Ulaon Parasinirohaon, dipargogoi Tuhani ma hita mangaulahon ulaon parasinirohaoni

 H:       Ale Tuhan, sai asi ma roham di hami, sai gabe parasi roha ma hami Songon Ho Ale Debata Parasirohai

 U:       Ndang taboto angka na masa na naeng siadopanta. Ndang adong na hot ianggo na di tano on, tung saluhutna do mubauba. Alai dohononta ma:

U+H:   Sai na donganan ni Debata do hita ganup ari, rasi rasa ro ajal ni hasiangan on. Jala sai tongtong hami mardalan di dalanMu Ale Jahowa

9. Marende B.E No. 683: 1    “Diadopanmu Jesus ”  (Laos Jongjong)

      ^♫♪♫ Di adopanMu Jesus lea tutu do diringkon,

Dibaen godang ni dosangkon di adopanMu Jesus.                    

10. Manopoti Dosa dohot Bagabaga Hasesaan Ni Dosa 

     U = Tatopoti ma dosanta tu Debata martangiang ma hita: Ale Tuhan Debata, Ama ni Tuhannami Jesus Kristus, Ho do Debata pargogo na so hatudosan, sitompa nasa na adong, paruhum na tigor, na manguhumi jolma manisia. Na ro do hami tu joloM manopoti dosanami, angka na huula hami marhite siaan pangalasionnami di patikMu, i ma marhite sian tubutubu ni rohanami na roa i, nang sian panghataionnami na so ture, ro di pangoloionnami di hisaphisap ni rohanami. Na tama situtu do hona uhum hami ala ni dosanami i, alai tarsolsolbagi do hami nuaeng ala ni i. Asi roham di hami ale Debatanami.         

 H:       Mangendehon  BE. No. 772 : 1  Tuhanku do pature dalanki,

Tuhanku do patiur langkangki,

Sian nasa rohangki hupasahat ngolungki,

Tuhanku do patiur langkangki.

U :       Pardengganbasa jala parasi roha do Ho ala ni Anak haholongan ni rohaM, Tuhan Jesus Kristus Tuhannami. Sai sesa ma dosanami saluhutna, jala suru ma Tondi Parbadia tu rohanami be, asa tarbahen hami mangoloi Ho dibagasan hatigoran dohot habadiaon, gabe sahat hami tu hangoluan na so ra suda, na pinarbagabagaM di angka na porsea di AnakMu, Tuhan Jesus Kristus, Tuhannami. Amen

     H = Mengendehon BE No.772: 3  “Tuhanku do pature dalanki”    BL.772   ^♫♪♫ Tuhanku do pature dalanki,

Tuhanku do patiur langkangki,

Hupasahat diringki tu tangan ni Tuhanki,

Tuhanku do patiur langkangki.

U = Hata baga-baga taringot tu hasesaan ni dosa: Songon on do Hata ni Tuhan Jesus: Ahu do dalan i dohot hasintongan dohot hangoluan. Ndang adong na sahat tu Ama i, ia so marhite sian Ahu. Hasangapon ma di Debata na di ginjang.

R = Amen!                                                                                     Hundul

11. Koor: LANSIA & LUNGGU, I

12. Marende sian BE. 384 : 1    “Roma hamu sude na”               BL. 398

      ^♫♪♫ Ro ma hamu rade do sasude !”

  Di jou hon Tuhan i tu hita be; Ro ho,

  Ho ro, ru ma inga nan mi

       Rade sude tu pardengganan I,

      Sai ro ma ho, di ho basaNa i. Ro ho………………

13. Epistel:

U:         Hata ni Debata na gabe turpuk Epistel di minggunta sadari on  tarsurat di Mateus 21:28-32 tajaha ma marsingkat soring:  Alai beha do di rohamuna? Adong ma dua anak di na sahalak; jadi ditopot ma sihahaan, didok ma tu ibana: Laho ma ho, anaha, sadari on mangula tu porlakta!

H:         Alai ro ma alusna: Ndang olo ahu! Hape disolsoli do rohana muse, gabe saut ma ibana laho.

U:         Ia amaama i ditopot ma sianggian i, laos songon i do hatana, gabe didok i ma mangalusi: Olo, tuan! Hape, ndang saut laho.

H:        Ise sian nasida na dua i mangulahon pinangido ni amanasida? Jadi didok nasida ma tu Ibana: Sihahaan i do! Dung i didok Jesus ma tu nasida: Situtu do na hudok on tu hamu: Tagonan do halak sijalobeo dohot boru na jahat bongot tu harajaon ni Debata, unang hamu!

U:         Ai na ro do si Johannes tu hamu di dalan hatigoran, ndang dihaporseai hamu ibana; alai anggo angka sijalobeo dohot angka boru na jahat porsea do. Diida hamu do i nian; laos tong so disolsoli hamu rohamuna, laho mangkaporseai ibana.Ido sahatna. Martua do angka natumangihon hata ni Debata jala na umpeopsa.

H :      Amen

14.Koor : AMA & INA PARARI SELASA

15. Marende BE. No. 714 :1 “Tuhan na marmahan hami” BL 714       

Tuhan na marmahan hami togi hami ruasMon,

Lehon dameMi di hami angka na hinophopMon.

Tuhan Jesus Sipalua, parmahani ruasMon,

Tuhan Jesus, Siparmahan, parmahani ruasMon.

                             Jongjong

Tuhan Parmahan haposan dongan na sumurung I,

Sai padao pangunjunan togu ma na lilu I,

Tuhan Jesus Sipalua pasupasu ruasMi,

Tuhan Jesus Siparmahan pasupasu ruasMi.

16. Manghatindanghon Haporseaon

U = Tahatindanghon ma haporseaonta i songon na hinatindanghon ni donganta sahaporseaon di sandok portibi on, rap ma hita mandok:

S =  Ahu porsea…du……         Amen.                                      Hundul

17. Tingting – Tangiang pangondianon

18. Marende BE. No. 504 : 1- “di Togu Tuhan Jesus Au”  (P. Pelean Ia,Ib)

Ditogu Tuhan Jesus au, i do na mangapuli au.

Diganup dalan nang tung maol,tanganna do tongtong huhaol,

Ditogu togu Jesus au, tanganna sai maniop au,

Tongtong ma siseanna au, paima boi tu surgo lao.

Holom pe angka dalan i, dilinggom hamatean i,

Tiur pe angka ari i, tung guru do di Tuhanki,

Ditogutogu…

                        ….Musik…

Gomos ditiop tanganki, sotung na silap langkangki.

Di nasa parsorionki, Ibana haporusanki.

Ditogutogu…

Ditanda angka dalanki, diboto parmaraan nii,

Tanganna i, na gogo i, manogu au tu surgo.

Ditogutogu…

19. Jamita : Psalmen 25:8-15   ( Pdt Robert Julius Sitorus, STh )

20. Marende BE. No. 719 : 1---“Hubege Jesus Manjou    ( Pelean II )

Hubege soaraM, O Jesus hubege soaraM O Jesus

Hubege soaraM O Jesus na manjouhon “ihuthon ma au”

Togu au Jesus Tuhanku iringiring ma langkangku

Patuduhon ma dalanMu asa unang unang lilu au.

Hupasahat ma diringku, hupasahat ma diringku,

Hupasahat ma diringku mangihuthon Jesus Tuhanki.

Togu au ………

            ……Musik…

Pargogoi ma au Tuhanku, pargogoi ma au Tuhanku,

Pargogoi ma au Tuhanku lao mamorsan silang na tu au.

Togu au ………

21. PELANTIKAN PANITIA ULAON PARASINIROHAON DISTRIK

1.Marende : No 720 : 1 Naeng Marsinondang Ngolungku  BL 720

Naeng marsinondang ngolungku di igil Jesus i,

Manang didia pe ahu tongtong huingot i.

Tiur marsinondang ido ni igil ni Jesus tongtong

Marsinondang panondang do au tutu.

       2.      Praeses:

Hamu angka dongan ruas dohot Parhalado huria ni Tuhanta , di ari on,Pabangkitonta ma Panita Pesta Puncak Ulaon Parasinirohaon HKBP Distrik VI Dairi 2019 Mardomu tusi tabege ma jolo Surat Keputusan ni Pimpinan HKBP Distrik VI Dairi Taringot tu nasida.

3.Manjaha Surat Keputusan Praeses ( Ditingki dijaha surat Keputusan dohot lampiranna ro ma sude angka naginoaran ondeng tu langgatan)

(Jinahahon ni Sekretaris Distrik : Pdt Maxdondo Debata Raja STh)

 PRAESES    ( Huhut Dijalang ) Huria ni Tuhanta ruas nang parhalado ni Hurianta Sa Distrik VI Dairion nuaeng jongjong do dison angka donganta naung itapillit  laho manghobasi angka ulaon na ringkot di tongatonga ni Distrik on. Sadarion  Pabangkiton ta ma nasida manghobasi Pesta Puncak Ulaon parasinirohaon HKBP Distrik VI Dairi 2019, Didongani, diurupi jala dipargogoi Tuhan Jesus Kristus Ulu ni Huriai ma hamu laho patupahon angka ulaon naung pinasahat tu hamu, marsangap ma Tuhanta jala las roha ni huriaNa marhite angka panghobasionmuna, Amen

4.Sude na hona lantik:

Na olo do ahu, sai didongani jala dipargogoi Tuhan i ma ahu patupahon saluhutnai  Amen

5.Praeses : Martangiang ma hita : Ale Debata Amanami, mauliate ma rohanaMi ala naung dipabangkit Ho do angka naposoM na olo mangula ditonga tonga ni Distrik on, asi ma rohaM Lehon ma tondi parbadia mangurupi, margogoihon, mamparbisuhi dohot mamparsahalai nasida dohot mangalehon roha na pantas mangaradoti sude ulaon naung pinasahat tu nasida. Hupasahat hami tangiang nami on marhite Goar ni AnakMu Tuhan Jesus Kristus Sihophop jala sipalua hami Amen

 ( Jongjong ma sude Panitia na hona lantik mangadop tu Huria dipasahat ma SK Laos di jalang ) Dungi mulak ma sude panitia tu hundulanna be)

6.Marende No 127 : 6    Lam Gogo    ( Jongjong ma Huria )

Pangke ma pangke ma, pangke ma gogom sude, patandahon haholongon ni roham di Jesus i, namangoli ho o sion mangoloi sude patikNai, pangke ma gogomi

  22. PARSURUON

      U  :  Dung i hubege soara ni Tuhan i na mandok: “ Ise do suruhononKu, jala ise  pardalannami?

H  : Dison do ahu Tuhan, suru ma ahu.

U  :  Laho ma hamu tu liat portibi on: Jamitahon hamu ma Barita na Uli I tu nasa na tinompa.

H :  Ale Tuhan sai Ajari ma hami Gabe Parasi ni roha songon Ho naung marasiniroha tu hami

U  :  Gabe parasiroha ma hamu, songon Amamuna, Parasiroha i!

 Nunga di asi i Debata hita, antong marsiadu ma hita patupahon Ulaon Parasinirohaoni

H  :  Mangendehon  BE.No.730: 4                       Sai patau ma au Tuhan.

1.                  Sai patau ma diringku ale Tuhan, Papatarhon hinauliMi Tuhan,

Suru ma TondiMi saor tu rohangki, Baen ias hata dohot parangengki.

 23. Tangiang Pelean-Ale Amanami-Pasupasu- Amen-Amen-Amen

24. Amen-Amen-Amen

Selamat dan Sukses

Panitia Pesta Puncak Ulaon Parasinirohaon

    HKBP DISTRIK VI DAIRI 2019

SELAMAT BEKERJA, SUKSES,  TUHAN MEMBERKATI

bidangmarturiahkbpdistrikvidairi.blogspot.com