TUKAR MIMBAR HKBP DISTRIK VI DAIRI BAHASA BATAK

“MANJANGHON DOHOT MANGULAHON PODA ”

1. Jou-jou marsomba tu Debata:  U: Uluan; R: Ruas; S:Sude  

U : Huria ni Tuhanta! Dibagasan serep dohot unduk ni roha tu Debata tahalashon ma parsaoranta di tongatonga ni bagas joroNa.

     H : Holan Ibana do partanobatoanku dohot hatuaonku, haporusanku, ndang tagamon humordit ahu.

     U : Di bagasan sadari on tung tama do hita mandok mauliate tu Debata, disaluhut pandonganion dohot pangaramotion ni Debata di sude pardalan ni ngolunta. Saluhutna i tung asi ni roha ni Debata do i tu hita. Ala ni tapuji ma Tuhanta, marende ma hita.

2. Marende sian B.E No. 116 : 1 + 4      “Ditompa Ho do Au”

Ø  Di tompa Ho do au, sondangi rohangkon; Tung basa-basaMi sude na di au on. Gomgomi pamatangku, naeng Ho do oloanku. Sai lehon ma gogongku, lomoM naeng ulaonku. Urupi tatap au tutu, Panompa na burju.  

….Jolo Musik…. Dung i Jongjong……

Ø  Ale Debatangki Sitolusada i  Bongoti rohangki parbadiai ma i. Sai Ho ma lam hutanda gogongku lam paganda Manangkup  haluaon, maniop hatuaon Ni Ama,Anak,Tondi i, na tong pujion i.

3. Votum - Introitus (Responsoria)      

U = Marhitehite Goar ni Debata Ama dohot goar ni AnakNa Tuhan Jesus Kristus dohot Goar ni Tondi Parbadia na tumompa langit dohot tano on. Amen. Tigor do angka dalan ni Jahowa, jala halak partigor mardalan disi; alai anggo halak parjahat tarsulandit do disi.  Haleluya.

S = Mangendehon: HALELUYA, HALELUYA, HALELUYA.

U = Martangiang ma hita:  Ale Tuhan Debata, Amanami, Pardengganbasa na sumurung! Na marpungu do hami dison , mangido tu Ho sian nasa rohanami: sai tambai ma haporseaonnami jala pargogoi hami, assa tarulahon hami parange na denggan, songon na pinangido ni rohaM sian hami. Sai ramoti hami ro di  hasusuda ni bohalnami, ala ni anakMu, Tuhan Jesus Kristus, Tuhannami.  Amen                                                 (Hundul)

4. Marende sian B.E No. 238: 3    “Ihuthon Ahu sude Hamu”                 

Ø  Hupatuduhon di hamu Sipasidingonmuna. Sude geduk ni rohamu Sipaubaonmuna  Ai naeng ias ma tondimu di na lao suda bohalmu.

5. Patik :

U = Patik ni Debata di minggunta sadarion i ma na tarsurat 2 Johannes 1 : 9, songonon ma didok disi: Ganup na mangalaosi na so mian di poda ni Kristus, ndang partohap i di Debata. Na mian di bagasan poda i do partohap di Ama i dohot di Anak i.  Antong, rap mangido gogo ma hita tu Tuhan Debata.

        S = Ale Tuhan Debata! Sai pargogoi ma hami mangulahon na hombar tu patikMi. Amen.

6. Koor:

7. Marende sian B.E No. 227 : 3 - 4   “Jesus Ngolu ni Tondingku”             

Ø  Jangkon au baen siseanMu Na girgir tu podaMi. Sai surdukkon ma tanganMu Asa tong hutiop i.

Ø  Tangkup au Jesus Tuhanku Tiop au mansai gomos. Asa unang runsur pathu Sian dalan na tingkos

8. Renungan Situasional: U:Uluan, A:Ama, I: Ina, R/N: Remaja Naposo

    U = Sai tarehonma pinggolmu tu podaNa i ai naeng patuduhononNa dalan di ho nuaeng tu surgo i.  

     A = Ale Tuhan, sai pagirgir ma rohangku lao mangulahon podaMi.  

     U =      Nunga lam torop nuaeng angka halak na mangaliluhon marhite poda na lipe na hinatahonna. Sai jagahon jala matahon dirim.

     I =   Ale Tuhan, sai pagirgir rohangku laho mangulahon podaMi.   

     U = Sai pasiding jala paholang ma dirim sian halak parpoda haliluon.  

     R/N =  Ale TUHAN, sai pagirgir ma rohangku laho mangulahon podaMi.   

U = Lam tang ma hamu marguru tu poda naung jinalomuna marhite hata ni Debata laho pasauthon lomo ni roha ni Debata di portibi on.

9. Marende B.E No. 248 : 1 + 8    “Saleleng Ho Di Tano on”        

Ø  Saleleng ho di tano on patigor ma rohaM. Paingotingot ma tongtong nidok ni Debatam.                                                                  ……Jongjong….

Ø  Antong ringgas ma hita be mangalo dosa i. Tahangoluhon ma sude na sian Tuhan i.  

10. Manopoti Dosa dohot Bagabaga Hasesaan Ni Dosa 

     U = Tatopoti ma dosanta tu Debata martangiang ma hita: Ale Tuhan Debata, Pargogo na so hatudosan, Parasi roha na sumurung, Ama ni Tuhan Jesus Kristus Sipangolu hami! Hami, halak pardosa na dangol on ro tu jolo ni habangsa habadiaonMi manopoti jala manganggukhon dosanami.

Manghuling Musik BE. No. 182 : 1

     U = Mansai jotjot huarsahi hami Ho marhitehite pingkiran dohot hata dohot pambahenan na roa i. Ndang huhaholongi hami ho sian nasa rohanami dohot nasa ateatenami dohot nasa tondinami dohot nasa gogonami; nang dongannnami ndang doshon dirinami hubahen hami. Dibahen i tama do rimasanMu jala uhumanMu hami tu hamatean saleleng ni lelengna i. Alai na maporus ma hami nuaeng tu asi ni rohaM na godang i mangido sian nasa rohanami hasesaan ni dosanami saluhutna. Sai urupi ma hami paubahon rohanami ala ni Tuhan Jesus Kristus, Anak haholongan ni rohaM, Sipangolu hami dohot ala ni GoarMu na badia i. Ale Tuhan, sai asi ma rohaM di hami halak na dangol on. Amen.           

S = Mengendehon BE No.182: 4  “Tu JoloM O Debatangku”    BL.24

            ^♫♪♫ Ala nii tungki rohangku,  jongjong di adopanMi,

                  Sai asi rohaM Tuhanku, sesa nasa dosangki.

U = Hata baga-baga taringot tu hasesaan ni dosa: Satongkin do Hutadingkon ho, alai papungupunguonHu ma ho muse marhitehite angka asi ni roha godang! Tagan di parpiar ni murukHu Hutabunihon bohingKu satongkin maradophon ho, alai marhitehehite dengganbasa salelenglelengna asianHu ho, ninna Jahowa Sipalua ho. Hasangapon ma di Debata na di ginjang.

R = Amen!                                                                                     Hundul

11. Koor:

12. Marende sian BE. 25 : 1 - 2    “HataMi Ale Tuhanhu”              

Ø  HataMi, ale Tuhanku, arta na ummarga i, sai paian di rohangku,  unang so hutiop i. Molo so be sitiopan hata na badia i, aha nama haojahan ni haporseaon i ?

Ø  Ale Jesus sai matahon, sai ramoti ma au on,  asa hot haporseaon  di bagasana rohangkon.  Sai paringas ma rohangku mangoloi di hataMi, asa mauas di podaMu songon si Maria i.

13. Epistel: Epesus 6 : 1 - 9

U =             Hata ni Debata na gabe turpuk Epistel di minggunta sadari on  tarsurat di Epesus 6 : 1 – 9, tajaha ma marsingkat soring: Hamu angka anak, oloi hamu ma angka natuatuamuna di bagasan Tuhan i; ai i do na tigor.

R = Parsangapi amangmu dohot inangmu! I do patik na parjolo mardongan bagabaga: .

U = Asa martua ho jala leleng mangolu di tano on.

R = Hamu angka ama, unang gintali hamu angka anakhonmuna; pagodanggodang hamu ma nasida di bagasan ajar dohot poda ni Tuhan i.

U = Hamu angka anak somang, oloi hamu ma angka indukmuna di hasiangan on mardongan biar dohot lomos ni roha; marroha na bulus songon na maradophon Kristus.

R = Unang hamu pangoloi di mata, songon na mambuat roha ni jolma; songon naposo ni Kristus ma ulahon hamu roha ni Debata, sian nasa rohamuna.

U = Ido sahatna. Martua do angka natumangihon hata ni Debata jala na umpeopsa. Amen.

14. Koor :

15. Marende BE. No. 800 : 1 + 4  “Paboa Tu Dakdanak I”        

1.                  Paboa tu dakdanak i, binaen ni Tuhan i,

UlaonNa gok huaso i, pinatupaNa i.                     …..Jongjong…..

2.                  Sai tapodahon ma burju, hataNa na tutu,

Sai pos rohana situtu, biar huhut burju.

16. Manghatindanghon Haporseaon

U = Tahatindanghon ma haporseaonta i songon na hinatindanghon ni donganta sahaporseaon di sandok portibi on, rap ma hita mandok:

S =  Ahu porsea…du……         Amen.                                                  Hundul

17. Koor

18. Tingting – Tangiang pangondianon

19. Marende BE. No. 750 : 1------- “Tu Tondingkon O Jesus”  (P. Pelean Ia,Ib)

1.                  Tu tondingkon O Jesus, patolhas HataMi

Asa sonang rohangku unang sai ganggu i.

Rohangkinon dohot tondingkon naeng tumangihon Ho,

Dison do au NaposoMon rade tumangihon Ho.

2.                  Parbadiai ma ahu jolma na ramun i,

Pangke ma au Tuhanku manjou na lilu i.

Rohangkinon ……...                                           ….Musik……

3.                  Rohangkinon O Jesus ndang au nampuna i,

Sandok ngollungku Jesus sahat tu Ho ma i.

Rohangkinon ………

20. Jamita : Poda 19 : 20 – 29

21. Marende BE. No. 719 : 1----                   “Hubege SoaraM O Jesus”

(Pelean II, Tumpak tu Ditrik)

1.                  Hubege soaraM, O Jesus hubege soaraM O Jesus

Hubege soaraM O Jesus na manjouhon “ihuthon ma au”

Togu au Jesus Tuhanku iringiring ma langkangku

Patuduhon ma dalanMu asa unang unang lilu au.

2.                  Hupasahat ma diringku, hupasahat ma diringku,

Hupasahat ma diringku mangihuthon Jesus Tuhanki.

Togu au ………                                       …Musik….

3.                  Pargogoi ma au Tuhanku, pargogoi ma au Tuhanku,

Pargogoi ma au Tuhanku lao mamorsan silang na tu au.

Togu au ………

22. Tangiang Pelean – Tangiang Ale Amanami – Pasupasu. Amen, Amen, Amen.