TATA IBADAH ULANG TAHUN HKBP DISTRIK VI DAIRI

PARTORDING NI PARMINGGUON

MINGGU SEPTUAGESIMA

ULANG TAHUN 73 HKBP DISTRIK VI DAIRI

DOHOT PARHUSORAN PARJAMITA

=========================================

TOPIK :

DEBATA DO MUAL NI HABISUHON

1 KORINTUS 1:18-25

HURIA KRISTEN BATAK PROTESTAN

DISTRIK VI DAIRI

__________________________________________________________________

MINGGU 17 FEBRUARI 2019

 

I.   PANGARADEON   

1.Mangarade ma di konsistori (Sude angka Parhobas )

2. Di tingki mardalan barisan prosesi, jongjong ma sude ruas ( Manghuling giringgiring)

II. ACARA PARMINGGUON

(U=Uluan; H; Huria, S:Sude, I;Ina , A:Ama, RN;Remaja Naposo )

U:             Huria na hinaholongan, tung tama situtu do pasahatonta Pujipujian tu Debata Ama, AnakNa

                 Tuhan Jesus Kristus dohot Tondi Parbadia, ala ni Pangaramotion dohot PandonganionNa na sahat hita nuaeng tu Minggu Septuagesimaon. Laos marningot hita muse naung boho Umur ni Hurianta HKBP Distrik VI Dairi on  73 taon.  Dung ojak Distrik on mamungka sian 03 Pebruari 1946  sahat tu naueng nunga 73 taon. Mansai denggan molo sai tapahusorhusor dirohanta angka ulaon dohot panjouon ni Tuhan i tu ganup Huria, nang Resort na adong di Distrik on, di angka panghobasion dohot parngoluon ni Huria  dohot di parsaoranta di na humaliang hita. 

         H  :  Nunga tangkas diajari Hata ni Debata hita asa lam togu hadirionta songon halak Kristen na tutu.

         U  :  Didok Topik ni Minggunta sadarion do : Debata Mual ni Habisuhon, Alani i, lam marbisuk ma Ruas nang parhalado tongtong dibagasan las ni roha, tapuji ma Tuhanta  di minggu lasniroha  sadari on, marende ma hita. 

1. Marende BE. No.  14 : 1 - 3“Puji hamu Jahowa tutu”BL. 57

Puji hamu Jahowa tutu, Pardengganbasa, parasiroha salelengna i.

Pardengganbasa i, parasiroha i.

Ingot tongtong, ale tondingkon,  Sude na denggan na dipasonggop Debata tu ho.  Denggan basaNa do na pangoluhon ho.

........Musik.... Jongjong.......

                 Nda tung adong, pargogo tongon,  Na martudosan, tu Tuhan Debata di surgo i.

                        Sun hinagogo, sun hinagogo i.

2. Votum

U  :    Marhitehite Goar ni Debata Ama, dohot Goar ni AnakNa Tuhan Jesus Kristus, dohot Goar ni Tondi Parbadia na tumompa langit dohot tano on. Amen. Mangasahon Debata sai hamonangan do ulahononta.

H  :    Ngot ma ho ale parhinaloan, tarsunggul ma di buha siang ari.

U  :    Pujiongku ma Ho di tongatonga ni angka bangso ale Tuhan, endehononku ma Ho di tongatonga ni angka marga. Haleluya

H  :    Mangendehon : HALELUYA.....HALELUYA....HALELUYA.

U  :    Martangiang ma hita : Ale Tuhan Debata, Pargogo na so hatudosan jala Pardenggan basa, Ro di salelenglelengna do asi ni rohaM. Mauliate ma rohanami tu Ho ala diramoti Ho hami nasailaon sahat ro di sadari on. Hupuji hami ma Ho, ala naung sahat tu hami Barita Nauli na sian anakMu Tuhan Jesus Kristus  na pangolu hami. Mauliate hudok hami tu Ho, ala dibagasan dame dohot hasonangan dilehon Ho HataM nabadia i.  Sai asi ma rohaM, urupi ma hami mangulahon na nidokMu, asa hot rohanami jala tarparangehon hami parange nabadia. Sai ajari jala paimbaru ma rohanami, asa lam ias hami ro di hasusuda ni bohalnami, marhitehite Tuhan Jesus Kristus Tuhannami. Amen

(hundul)

03.  K O O R :

04.  Marende BE. No.575 : 1“Pujima Debata na songkal”BL. 575

          Puji ma Debata na songkal pasangap ma goarNa

Puji ma angka rura dohot lung, angka dolok na timbo

Dohot hasak ni galumbang sude mamuji Ho.

Langit i na mansai hembang bintang i

Na mansai torang ombun i na mansai saksak

Pasangaphon Ho  O Debata tung so olo tading au

Lao mamuji Ho Tuhan nasa gogo bahenonku

Lao pasangaphon Ho ro di ujungni ngolungku

Sai pujionku Ho

05. Patik ni Debata.

U  : Patik ni Debata di minggunta sadari on, ima Patik Pa onom hon dohot Lapatanna  “Unang ho Mamunu”  Diado lapatan ni i

H  :  On do: Ingkon dihabiari rohanta Debata jala ingkon holong rohanta di Ibana asa unang hita olo mambahen sahit-sahit tu nasa na mangolu, ingkon roha pangoluhon do rohanta di nasa namangolu

U  :  Songon i ma sahatna. Antong Rap ma hita mangido gogo tu adopan ni Debata !

S  :  Ale Tuhan Debata, sai pargogoi ma hami, mangulahon na hombar tu PatikMi. Amen.

06. K O O R

07. Marende BE. No. 432:1                  “Sian Hurungan ni dosangki ”                      BL.292

1.      Sian hurungan ni dosangki ro au tu Ho, Ro au tu Ho.

Tu haluaon di mudarMi Jesus au ro tu Ho Nasa rohangku malum, hipas,

Gabe mamora, nang pe pogos, Sian jeangku ro au tu Ho, Jesus au ro tu Ho.

08. Mangarimangi Partingkian

U  :             Huria ni Tuhanta, tung saluhut do hita manjalo pasupasu na godang na sian Tuhanta i. Alani i, patut ingkon hamauliatehononta angka pasupasu na tajalo sian Tuhan i.

A  :             Ale Tuhannami, Ho do mamillit dohot manjou torop jolma asa manjalo sian pasupasuMi. Dipapungu Ho do nang hami nuaeng di huriaM laho pasangaphon Ho, ala uli ni pambahenanMu tu Hurianami be.

U  :              Sai didongani Asiniroha ni Debata nagodang i ma sude Hurianta di HKBP Distrik VI Dairi on, Patar ma nang pasupasuNa di ngolunta,  jala lam martambatamba pasupasu i di hita marhite ulaonta siganup ari. Holong dohot bagabagaNa, ima na mangaramoti sude huriaNa sian ari sadarion, ro di saleleng ni lelengna.

I    :             Saluhutna na boi hupelehon hami, ndada na patuduhon huaso dohot hagogoonnami, alai naeng patuduhononami do holong dohot haunduhonnami tu Ho ale Tuhannami marhite naung gok Umur ni Distrik VI Dairi on 73 taon

U  :              Naung dihaholongi jala ditopot Debata Huria ni halak Kristen di portibi on, JagaonNa jala pasupasuonNa do hita. Aha ma tama bahenonta balosni i ? Ndada sere manang perak pinangidoNa, talehonma angka na dumenggan jala lomo ni roha ni Tuhan i tu tonga ni huriaNa, ima songon tanda mauliate ni rohanta tu Ibana.

RN              Ale Tuhannami, huhamauliatehon hami do denggan ni basaM dohot pasupasuM tu  Distrik nami on. Sai ajari ma hami mamuji Ho, anggiat gabe angka anak hatiuron jala na marbisuk hami di bagasan Ho, jala gabe pasupasu nang huriaM  marsadasada, Resort Marsada sada  di masyarakat nang di bangso nami on

S   :             (Mangendehon) BE. No.116 : 1              “Ditompa Ho do au”                 BL.243

Ditompa Ho do au, sondangi rohangkon

  Tung basabasaMi sude na di au on

  Gomgomi pamatanghu, naeng Ho do oloanhu

  Sai lehon ma gogongku, lomom naeng ulaonhu

 Urupi tatap au tutu Panompa na burju

U  :              Dihaporseai rohanta do, na diparade Debata do hangoluan na dumenggan di angka naporsea i. Sai patogu ma roham, jala pahot roham laho mangihuthon Tuhantai manongtong salelenglelengna.

09. Marende BE. No.417:1-2“Rade situtu haluaon”                     BL. 278

Rade situtu haluaon nanaeng tangkuponmu antong

Rade nang di ho hatuaon, si halashononmu tongtong

Bernit do ditaon Tuhanmu pasaehon dosam sasude

Tung unang paujat Ibana, sai janghon panghophopNa i

                     .(Jongjong)

Patedek sude hahurangan, topoti sandok dosami

Pangido sai sesa o Tuhan, sude pangalaosionhi

Datdati sai saut botoonmu naung sesa dosam sasude

Mardame dagingmu nang tondi maniop tongtong Tuhan i

10.  Tangiang manopoti  Dosa.

U  :  Martangiang ma hita : Ale Tuhan Debata pargogo na so hatudosan jala Amanami. Hujou hami do GoarMu na badia i, ala na targogot hami marningot dosanami. Sai marasiniroha ma Ho mida hami on.

R  :  Mangendehon BE. No.182 : 1   “Tu joloM o Debatangku”BL.24

Tu joloM o Debatangku, sai use do rohangkon

         Sai pasiat tangianghu, dohot iluilungkon

U  :              O Tuhan Jesus Kristus, Anak ni Debata na gabe jolma ala ni hami, na mate jala na hehe sian namate, na manaek tu banua ginjang do Ho mangondihon hami. Asi rohaM di hami, sai patongtong ma di hami roha hamauliateon tu Ho.

R  : Mangendehon BE.No. 182: 2  “Tu joloM o Debatangku”BL.24

Ø      Husolsoli do rohangku, na gok dosa i tongtong

Ai godang ariaringku, na hubahen ambolong

U  :              O Tondi Parbadia, pangapul di na marsak roha, pamalum ma saluhut na bernit binahen ni dosanami. Ro ma Ho mangingani hami, asa marlasniroha hami mangulahon lomo ni rohaM. Ho do parhitean ni nasa asi ni roha, sai unang tulak hami. Sai tangihon ma hami, Ho ale Debata Ama, Anak dohot Tondi Parbadia. Amen.

R  : Mangendehon BE. No. 182: 4 “Tu joloM o Debatangku”BL.24

Ø   Ala nii tungki rohangku, jongjong di adopanMi

Sai asi rohaM Tuhanhu, sesa nasa dosangki

U  :  Bagabaga ni Debata Taringot tu hasesaan ni dosanta: Parasiroha jala pardengganbasa do Jahowa, lambat tarrimas jala Parasiroha godang. Ndang dibahen tu hita hombar tu angka dosanta, jala ndang dibaloshon tu hita hombar tu angka hajahatonta. Songon asi ni roha ni amaama mida angka anakna, asi ni roha ni Jahowa di angka na manghabiari Ibana. Hasangapon ma di Debata na di ginjang.

R  :  Amen.(hundul)

11. Marende BE.No. 656: 1                “Parhahamaranggion i”                        Bl. 656

Parhahamaranggion i, lam  hot jala togu,

Singkop ma hasadaon i, di Jesus i burju,

Rap sauduran hita be marholong na tutu,

       Mardame, marlas roha ma di Jesus i tutu

12.  Epistel  :

U  :              Hata ni Debata, Epistel di Minggunta sadarion, ima na tarsurat di Job 28:20-28  songonon ma didok disi, tajaha ma marsingkat sorin “Antong marharoroan sian dia ulaning hapistaran i? Jala didia ulaning jumpang inganan ni parbinotoan?

H :  Ai holip do i sian mata ni saluhut na mangolu, jala buni do i nang moradophon pidong angka na martongatonga langit.

U :   Banua toru dohot hamatean mandok: Nunga nian dibege pinggolnami lingona.

H:    Debata sambing tahe mangantusi dalanna, jala Ibana umboto ingananna.

U:   Ai Ibana manatap sahat ro di angka ujung ni tano on, Ibana marnida saluhut na di toru ni langit.

H:   Uju na binahenna timbangan ni alogo, jala dipaojak * parbalohan ni angka aek.

U:     Uju na binahenna patik di udan, dohot dalan di porhas.

H:   Uju i nunga Ibana martiruan tusi, jala dipapatar, jala dipadiri ojahanna huhut * disulingkit.

U:  Alai anggo tu jolma i songon on do hatana: Ida ma, * biar mida Jahowa, i do hapistaran, jala * sumurut sian hajahaton, i do parbinotoan   Songonima sahatna: “Martua do na tumangihon Hata ni Debata jala na umpeopsa”.

R  : Amen 

13. K O O R

14.  REFLEKSI 73 Taon HKBP Distrik VI Dairi

U:        Mauliate ma hudok hami tu Ho Ale Debata, Di ari 03 pebruari 1946 manjae ma Distrik VI Dairi on, Manjae sian Distrik Sumatera Timur mangihuthon haputusan ni ompui Ephorus HKBP tuan Pandita Justin Sihombing, dungi di ari 13 September 1946 di resmihon ma gabe Distrik na Gok di Huriata naboloni HKBP  mauliate jala pujipujian ma hupasahat hami tu adopanMu nabadia i

H:        (Mangendehon BE 651)    Huria na huhalongi hami

Huria na huhaholongi hami, napinajongjong ni Tuhanta i

Tung na so lupa sian rohanami Huriai dohot ruasNa i

U:        Asi ni rohaM do na mandongani HKBP Distrik VI Dairi on gabe di paojak Ho NaposoM tuan Pdt Kilian Togatorop manguluhon Distrik on Songon Praeses na parjolo ni donganan ni tuan K.K. Jonathan Sitohang songon Karkbestur, Ujui Dua onderdistrik dope distrik dairi on ima : Ondesrdisrik Sidikalang naniuluhon ni Pdt K Togatorop, Resort Lae Perira niuluhon ni Pdt D Simbolon , Resort Tigalingga niuluhon ni Pdt J Simorangkir Resort Sumbul ni uluhon ni Pdt A Naibaho, Resort Parongil niuluhon ni Pdt H Sinaga, Onderdistrik Simsim, Resort Salak niuluhon ni Pdt S Pasaribu, Jala sahat tu Saonari nunga gabe 31 Resort be Distrik VI Dairi on Mauliate ma di Ho Tuhan namangaramoti Huria-Mon

H:        (Mangendehon ) BE 651 Huria na huhaholongi hami

Huria na huhaholongi hami, napinajongjong ni Tuhanta i

Tung na so lupa sian rohanami Huriai dohot ruasNa i

U:        Pangontak ni na Masa na Marpanghorhon tu Huria, Didongani asi ni RohaM do Huriaon ale Tuhan, Di Ari 29 April 1946 Pukul 8 Manogotna ro do torop Tentara sian Aceh dohot sian Sumatera Timur laho manangkupi angka pangituai di luat Dairi on suang songoni ma laos tartangkup do angka tuan pandita  namanghobasi di Dairi on hinorhon ni angka hagunturon di luat on,  tarhira torop do nasida na tartangkupi toropna 29 halak hinorhon ni i gabe gale do Huria i , alai di ari  3 Mei 1946 mansohot ma hamaoloni dibagasan hadameon ma Luat Dairi on jala mangula ma muse angka parbarita na uli sahat tu tano Karo, Tuhanta do namangamudihon HuriaNa nang di angka parungkilon i.

H:        (Mangendehon) BE 561    Huria na huhaholongi hami                       (samb...)

Dinasa hasusaan tongtong doi Manahan, manggogo pe angka galumbangi

Tuhanta do na pademakhoni, Martua do na hot di Tuhan i

U:        Mauliate ma di Ho Tuhan naung marmuduhon HuriaM Dohot angka naposoM Laho pahembanghon HuriaM di Distrik on, Huhamauliatehon hami ma Denggan ni BasaM na godangi naung mangaramoti ganup Huria marsada-sada , Ganup Resort marsadasada di na 31 Resort na masuk tu Distrik VI Dairion, Lam pasada ma rohanami, ruas nang parhalado laho mamuji pasangaphon Ho di tonga-tonga ni HuriaM, Sudena i alani asinirohaM na godangi do, Hupuji hami ma Ho Tuhan olat ni on rodi saleleng ni lelengna  

H :(Mangendehon ) BE 651    “Huria nahu haholongi hami

Huria na hinophop ni Tuhanta,

Sai mian ma di haholongon i.

Sahata ma pangula nang ruasNa,

Manomba Jesus na marsangap i,

Sai timbul hadameon lam tang haporseaon.

            Manggogo pe angka galumbang i,

            Tuhanta do pademakhon i,

            Martua do na not di Tuhan i.

U: Hasangapon ma di Debata di ginjang

H: Amen

15. Marende BE.No. 654: 1 +3 “Marpungu Sude”                                    BL.654

Marpungu sude mangido tu Tuhanta

            asi ni rohaNa nang lomoNa i,

            naeng pasohotonNa doparungkilonta

            sai ramotanNa do HuriaNa i.

                             (Jongjong)

Tapuji Tuhanta na pamonang hita,

Huhut tumangianghon Huria i,

Asa monang di sude parungkilonna,

Pasangap Tuhan  i salelengna i.

16. Manghatindanghon Haporseaon

U:   Tahatindanghon ma Haporseaonta i songon na hinatindanghon ni donganta sa haporseaon

       di sandok portibion, rap ma hita mandok:

 S:   Ahu Porsea........(hundul )

17.  Tingting + Tangiang Pangondianon

18. Marende No. 657  “Ulinai Huria i”   ( Pel. Ia + Ib )BL. 657

                  Uli na i HuriaMi na pinapungupunguMi

Marpungu do sudena i mamuji Ho Tuhan na sangap i,

Tangiang nang endena i na pasangaphon goarMi,

Sai topot ma HuriaMi na pinapungupunguMi.

       Tumpahi ma HuriaMi, tumpahi ma HuriaMi

---Musik----

Huria ni Tuhanta i, hinophop ni mudarNa i,

Pahot tongtong pingkiranmi,

Maniop Tuhanmi parholong i.

Sai unang olo talu ho, bahenon ni Sibolis i,

Sai pangidohon ma gogo tu Raja ni Huria i.

Tumpahi ma HuriaMi, Tumpahi ma HuriaMi.

                                    -Musik -

19. Jamita : 1 Korintus 1:18-25

20. MarendeBE No. 653: 1…“Na tama do Ingotonta” BL.653

(Pelean II: TUMPAK TU DISTRIK)

Natama do ingotonta taon parasi ni rohaon on

Jubileum parningotan, di Hita na sa Distrik  on

*Nunga pitupulutolutaon naung ojak Distrik ta  on.

            Taon parolopolopon on di hita nasa Distrik on.

Ta olophon denggan basa na ita jalo sian Debata,

Saluhut do disarihon, na ringkot dingolunta on,

Lam togu ma parsaoran dihita HuriaNa on,

Radot masitangiangan ma, marsiurupan hita on.

----Musik----

Ruas angka na matua, baen tiruan hita on tongtong,

Maradophon anakhonta, tangkas ma ingot i tongtong,

Sundut na umposo i do na sumingkati hita on,

Togu-togu, tangiangkon ma, asa jonok tu Debata.

Rade haporseaonta lao mangadopi hamajuon on.

Asa gabe pasupasu, panghorhon nii tu hita on,

Tung tangkas ma tapoda i, anakhon ni Huria i,

Asa jolma halomoan i di hita nang di Tuhan i.

21.  Parsuruon

U  :              Hamuna angka dongan na hinaholongan, Dijou Tuhan Jesus do hita ,ndada holan ro tu adopanNa, alai asa laho do nang hita mangulahon parsuruonNa dibagasan habisuhon na sian Ibana ai Debata do mual ni habisuhon

H  : Dison do hami, sai suru ma hami jala parbisuhi.

U  :             Borhat ma jala hobasi lomo ni roha ni Tuhan i hombar tu angka silehonlehon na sahat tu ho.

H  : Sai suru ma hami laho mamaritahon huasoM sangkapMu na manongtong tu saluhut jolma.

U  :              Sai ingotma, Holong ni Tuhanta i ndang marnamontok, sai imbaru doi ganup ari.

H  :             Mandok Mauliate ma hita  tu Debata. Ai pardenggan basa do Ibana

S   :             Mangendehon BE No. 730  :  1 “Sai patau ma diringku”          BL. 730

Sai patau ma diringku ale Tuhan,

Papatarhon HinauliMi Tuhan,

Suru ma tondiMi saor tu rohangki,

Lao papatar HolongMu tu donganki.

22.  Tangiang Pelean

23.  Tangiang Ale Amanami

24.  Pasupasu+ Amen – Amen- Amen

SELAMAT  ULANG TAHUN  KE 73 HKBP DISTRIK VI DAIRI

03- PEBRUARI 1946- 03 FEBRUARI 2019

                bidangmarturiahkbpdistrikvidairi.blogspot.com